RTÉ 2020 Tuarascáil Bhliantúil

Inniu, amárach, le chéile

Is é RTÉ eagraíocht náisiúnta meán cumarsáide seirbhíse poiblí na hÉireann – ar an teilifís, ar an raidió, ar líne agus ar ghléasraí soghluaiste.

An 60ú Tuarascáil Bhliantúil agus Ráitis Airgeadais an Ghrúpa don mbliain dar críoch an 31 Nollaig 2020 arna gcur faoi bhráid an Aire Turasóireachta, Cultúir, Ealaíon, Gaeltachta, Spóirt agus Meán de réir alt 109 agus alt 110 den Acht Craolacháin 2009.

Is féidir leagan Béarla den Tuarascáil a íoslódáil ó www.rte.ie/annualreport

Bhí na mílte i mbun spraoi le #RTEVirtualParade ar Lá Fhéile Pádraig.

Tháinig na mílte eile le chéile le RTÉ chun solas a lonrú do #ShineALight.

Mealladh páistí (agus tuismitheoirí) chuig RTÉ Home School Hub.

Bhreathnaigh 1.7 milliún duine ar The Late Late Toy Show ar ardáin RTÉ.

Cothaíodh dlúthpháirtíocht agus teacht aniar leis an togra ealaíne Illuminations.

B’ábhar mór méala ag RTÉ bás Marian Finucane a fhógairt i mí Eanáir.

Súil Siar an Phríomh-Stiúrthóra

Leagtar cúraimí faoi leith ar RTÉ ina ról mar mheáin chumarsáide náisiúnta seirbhíse poiblí. I gcroílár na gcúraimí sin, tá an dualgas chun seirbhís chuimsitheach neamhchlaonta nuachta a chur ar fáil do mhuintir na hÉireann, chomh maith le siamsaíocht, eolas agus oideachas a chur ar fáil. Ní raibh na dualgais sin chomh riachtanach ná chomh soiléir riamh agus a bhí i rith na bliana 2020.

Nuair a bhí an tír ar fad i gcruachás, chas gach aoisghrúpa den lucht éisteachta agus féachana ar an gcraoltóir náisiúnta chun eolas, comhairle, siamsaíocht, comhluadar, caitheamh aimsire agus caidreamh chultúir a sholáthar. Tráth a bhfuil míthreoir agus mí-eolas á scaipeadh, chuaigh na milliúin de shaoránaigh na hÉireann i muinín na meán cumarsáide seirbhíse poiblí níos mó ná riamh. Is léir ó thorthaí taighde a rinneadh go neamhspleách gur chuig Nuacht RTÉ a chuaigh 90% de na daoine chun teacht ar eolas ríthábhachtach i rith na bliana 2020; dhearbhaigh taighde B&A go ndúirt ceathrar as gach cúigear a cuireadh faoi shuirbhé go raibh seirbhísí teilifíse nó raidió RTÉ á n-úsáid acu chun eolas a fháil. Thug 76% le fios gur mó iontaoibh a bheadh acu as na foinsí sin ná as aon fhoinse eile.

Agus muid ag breathnú siar anois air, is ábhar iontais gur éirigh le RTÉ sceidil iomlána a choinneáil ar an aer do na seirbhísí ar fad i rith na bliana 2020, agus gur cuireadh leis an gcraoladh nuair a bhí gá leis le cláracha beo sa bhreis agus le cláracha nua freisin. Cé gurbh éigean an obair léiriúcháin ar chláracha áirithe a chur ar athlá nó a laghdú mar gheall ar shrianta sláinte poiblí, rinneadh coimisiúnú ar chláracha ábhartha eile le sprioc amanna fíor-dhochta. Ní raibh sé éasca beag ná mór seasmhacht agus toradh saothair ar an leibhéal sin a thabhairt i gcrích nuair a bhí oiread de dhúshlán i gceist. Is ábhar mór mórtais agam an díograis agus an dúthracht a chaith an lucht foirne agus ár bpáirtnéirí in earnáil na léiritheoirí neamhspleácha le teacht ar sheifteanna agus ar mhodhanna oibre nua chun a chinntiú gur cuireadh seirbhísí ar fáil do mhuintir na hÉireann le teann cruthaitheachta, samhlaíochta agus díocais.

Léigh tuilleadh...

Ráiteas an Chathaoirligh

Bhí cuid mhór codarsnachta ag baint leis an mbliain 2020, bliain na paindéime. An tráth céanna a rabhthas ag aimsiú bealaí chun dul i ngleic leis na deacrachtaí agus na tubaistí a tharraing an víreas, bhí modhanna nua smaointeoireachta, seifteanna nua agus bealaí nua cumarsáide ag teacht chun tosaigh chomh maith le cineálacha nua den chomhpháirtíocht phobail.

Léigh tuilleadh...

Athbhreithniú Airgeadais

Mar ab amhlaidh le go leor gnónna eile, bhí tionchar mór ag an bpaindéim Covid-19 ar sheasamh airgeadais RTÉ. Bhí laghdú dian agus laghdú dá leithéid nach bhfacthas riamh cheana ar ioncam, ar ioncam tráchtála agus ar ioncam ón táille ceadúnais araon mar thoradh ar an gcéad tionchar a bhí ann de bharr shrianta na paindéime, agus cuireadh stop le gníomhaíochtaí léiriúcháin freisin dá mbarr.

Léigh tuilleadh...

RTÉ: Ábhar na bliana 2020

Nuacht & Cúrsaí Reatha RTÉ

Ba bhliain í nach bhfacthas a leithéid riamh cheana, in Éirinn agus ar fud an domhain, agus bliain inar dhírigh níos mó daoine ar RTÉ maidir le Nuacht agus Cúrsaí Reatha ná in aon bhliain eile go dtí seo. RTÉ a bhí ar an gcéad rogha ag 90% de mhuintir na hÉireann maidir le heolas faoi phaindéim Covid-19 (Taighde Amárach thar ceann na Roinne Sláinte).

Fíorasach

De réir mar a bhí paindéim Covid-19 ag dul i bhfeidhm, chuaigh meithleacha léiriúcháin ar fud RTÉ agus earnáil na léiritheoirí neamhspleácha in oiriúint do na deacrachtaí a bhí á gcur rompu agus tugadh faoi mhodhanna nua oibre chun leanúint de chláracha ar ardchaighdeán a chur ar fáil agus chun cláracha nua ar fad a thabhairt chun cinn a shásódh an t-athrú ar éileamh an lucht féachana agus éisteachta. Bhí dreamanna líonmhara den lucht féachana agus éisteachta an-tógtha leis an dá chineál a cuireadh ar fáil.

Drámaíocht agus Greann

Fostaíodh 20 scríbhneoir, 60 aisteoir, ceathrar stiúrthóirí, beirt chumadóirí ceoil agus beirt dhearthóirí fuaime ar Drama on One ar RTÉ Radio 1 i rith na bliana 2020 i mbun 20 dráma nua raidió de chuid na hÉireann a chraoladh. Ar na scríbhneoirí a bhí páirteach san obair, áirítear Liz Nugent, Michele Forbes, Tracy Martin, Caitríona Ní Mhurchú, Niamh Campbell, Vincent Woods, Stephen Jones, Bernard Farrell, Aidan Mathews, Alan McMonagle, Patrick McCabe agus John Boorman. I rith na bliana freisin, coimisiúnaíodh saothar nua ó scríbhneoirí na hÉireann le haghaidh Long Story Short, sraith eile de chuid Drama on One ag díriú ar shaol na paindéime.

Siamsaíocht agus Ceol

Bhí tús breá láidir le hobair na bliana le sraith eile de Dancing with the Stars (ShinAwiL); bhuaigh an láithreoir Lottie Ryan sraith na bliana 2020 díreach agus tús á chur leis an dianghlasáil. Le linn reimsí éagsúla dianghlasála lean an Late Late Show ag insint scéalta an phobail, fiú gan slua i láthair sa stiúdió. Thug an seó ardán sábháilte chuige sin le linn na paindéime ar fad chun lón eolais, foghlama agus siamsaíochta a chur ar fáil dúinn i rith an athrú saoil. Cuireadh saothar earnáil na carthanachta sa lárstáitse soiléir ar an gclár agus bailíodh níos mó ná €7.5 milliún trí fheachtais an chláir ar mhaithe le cúiseanna éagsúla, mar shampla cosc ar féinmharú, taighde ar ailse agus cás iad siúd gan dídean. Bailíodh €6.7 eile leis an Toy Show Appeal do leanaí a bhí i bpriacal ar fud na tíre.

Na hEalaíona agus Cultúr

Lean RTÉ i rith na bliana 2020, sular tháinig an phaindéim agus le linn srianta a bheith i bhfeidhm, d'ábhar ealaíne agus cultúir a chur ar fáil a raibh lón anama ann ag daoine. Chuathas in oiriúint, mar ba ghá, do na deacrachtaí praiticiúla agus do na srianta oibre a bhaineann le Covid-19. Coinníodh bunsraith sceideal craoltóireachta na gcláracha Ealaíon agus Cultúir ar siúl trí mhodhanna nua oibre a leagan amach go sásúil, léiriúchán craoltóireachta ilardáin san áireamh freisin, ionas go mbeadh ábhar spreagtha, ábhar sóláis agus lón intinne ag an lucht féachana agus éisteachta.

Spórt RTÉ

Ba anróiteach an bhliain maidir le cúrsaí spóirt í an bhliain 2020 nuair ba bheag nár chuir Covid-19 deireadh go hiomlán le féilire na n-imeachtaí spóirt, go náisiúnta agus go hidirnáisiúnta. Cuireadh na comórtais mhóra sacair san Eoraip, na Cluichí Oilimpeacha agus craobhchomórtais CLG ar atráth agus d'fhág sin cuid mhór deacrachtaí lóistíochta, eagarthóireachta, airgid agus sceidle. Cé go raibh taitneamh le baint as ábhar cartlainne, níorbh ionann é agus imeachtaí spóirt beo. Rinne na heagraíochtaí spóirt go maith ag dul in oiriúint do chúinsí na linne agus ag leagan amach pleananna teagmhais.

Daoine Óga

Cuireadh tús leis an mbliain 2020 le sceideal lán d'ábhar beo beathach agus d'ábhar beochana ar TRTÉ agus RTÉjr. D’fhill sraitheanna de leithéid RTÉjr Goes Dancing with the Stars, Body Brothers agus Bright Sparks, a mbíonn an-tóir orthu, a chuir ábhar spéise, eolais agus siamsaíochta ar fáil don sciar is óige den lucht féachana.

An Ghaeilge

Thug RTÉ geallúint go gcraolfaí ar a laghad 530 uair a chloig d'ábhar Gaeilge ar fud ceithre chainéil teilifíse líneacha RTÉ ón mbliain 2020 amach, ardú níos mó ná 400 uair a chloig. Áirítear ar an ábhar sin meascán d'ábhar arna léiriú go hinmheánach, d'ábhar coimisiúnaithe agus d'ábhar ceannaithe ó TG4. Faoi mhí na Nollag 2020, bhí níos mó ná 700 uair a chloig d'ábhar Gaeilge craolta ag RTÉ ar an teilifís, níos mó ná 1,100 uair a chloig ar RTÉ Player agus beagnach 9,000 uair a chloig ar an raidió.

RTÉ: Obair na Bliana 2020

Cothú na Cruthaith-eachta

Leis an ábhar agus leis na cláracha, leis na seirbhísí agus leis na daoine, sheas RTÉ le cultúr na hÉireann, le muintir na tíre, leis an oileán agus leis an iléagsúlacht.

Ilchineálacht Bhreise, Uileghabh-álaíocht Bhreise

Tá RTÉ tugtha do cheannródaíocht a spreagadh maidir le cúrsaí ilchineálachta agus uileghabhálachta.

Breis Áisiúlachta, Breis Foghlama

Tá RTÉ tugtha d’fheabhas a chur ar sheirbhísí áisiúlachta agus do dheiseanna tairbheacha oideachais a chur ar fáil do shaoránaigh na hÉireann.

Cúnamh Taca don Phobal

Tá RTÉ tugtha do chúnamh taca a thabhairt don phobal i gcomharsanachtaí logánta a gcuid scéalta a chur in iúl, a gcuid cruthaitheachta a thabhairt chun cinn agus a gcuid tuairimí féin a chur i láthair.