Is ar athoscailt scoileanna na tíre a dhíreofar i straitéis athbhreithnithe an Rialtais in aghaidh Covid-19 atá le foilsiú níos deireanaí inniu.
Tá an plean maidir le maireachtáil le Covid-19 á chaibidil i dtosach ag cruinniú Rialtais a thosaigh ag thart ar 1.30.
Cé is moite de na scoileanna, meastar nach mórán leasuithe a dhéanfar ar na srianta atá i bhfeidhm faoi láthair.
Glactar leis go deimhin nach maolófar srianta Leibhéal 5 go ceann sé seachtaine eile ar a thúisce.
Aontaíodh an straitéis athbhreithnithe aréir tar éis d'fhochoiste an Rialtais maidir le Covid-19 an fhaisnéis is deireanaí i dtaobh an ghalair in Éirinn a fháil ó Leas-Phríomhoifigeach Leighis an Dr Rónán Glynn agus ó cheannasaí Fheidhmeannacht na Seirbhíse Sláinte Paul Reid.
Tuigtear go bhfuil sé i gceist scoláirí Ardteistiméireachta, naíonáin bheaga, naíonáin mhóra, agus Rang 1 agus 2 sa bhunscoil a thabhairt ar ais ar scoil Dé Luain seo chugainn.
Coicís ina dhiaidh sin, ar an 15 Márta, tabharfar daltaí eile bunscoile ar ais chomh maith le lucht an chúigiú bliain i scoileanna dara leibhéal.
Tabharfar na ranganna eile i scoileanna dara leibhéal ar ais ar an 12 Aibreán, sin i ndiaidh shaoire na Cásca.
Tuigtear freisin go bhfuil sé mar aidhm sa phlean ionaid chúraim leanaí a oscailt arís de réir a chéile sna seachtainí amach romhainn.
