Tá sé ráite ag Údarás na Gaeltachta go n-aimseofar breis airgid d'Fhóram Pleanála Teanga Chois Fharraige i gConamara lena bplean teanga a chur i bhfeidhm agus go mbeidh an tÚdarás féin in ann cuid de na beartais atá sa phlean a mhaoiniú.
Glacadh d'aon ghuth ag cruinniú den Fhóram Pleanála Teanga aréir nach nglacfaí leis an maoiniú atá Údarás na Gaeltachta a thairiscint leis an bplean teanga a fheidhmiú.
Inniu, thug an tÚdaras le fios go mbeidh os cionn €1 milliún sa bhreis ar fáil an bhliain seo chugainn. Thug siad le fios go bhfaighfear airgead ó fhoinsí eile freisin.
Fógraíodh an mhí seo caite gur €100,000 in aghaidh na bliana agus fostaí amháin a bhí ceadaithe ag Roinn na Gaeltachta don phlean. Is é Údarás na Gaeltachta atá ag riar an phróisis.
Sa phlean a d'aontaigh Fóram Pleanála Teanga Chois Fharraige le hÚdarás na Gaeltachta i mí an Mhárta, áfach, dúradh go dteastódh €250,000 in aghaidh na bliana chomh maith le triúr fostaithe lánaimseartha leis an obair a dhéanamh.
Casfaidh ionadaithe ón Roinn, ón Údarás agus ón bhFóram le chéile go luath i mí na Samhna leis an scéal a phlé.
Dúirt an tÚdarás inniu gur cás ar leith é an phleanáil teanga i gCois Fharraige mar go bhfuil 8,000 duine ina gcónaí ann, an limistéar pleanála teanga is mó i ndiaidh Ghaoth Dobhair.
