Tá ag teipeadh go hiomlán ar Chomhairle Contae Dhún na nGall bainistiú mar is ceart a dhéanamh ar thogra turasóireachta Shliabh Liag, a deir Breandán Ó Beirn, Oifigeach Caidrimh Poiblí Choiste Forbartha na Carraige.
Níl eolas ar bith á chur ar fáil ag an gComhairle do phobal na háite faoin bplean forbartha do Shliabh Liag, a deir sé.
Deir Breandán Ó Beirn freisin nach bhfuil guth ar bith ag pobal na háite faoin obair atá le déanamh ar chosán coise Shliabh Liag.
Tá togra Shliabh Liag i measc na dtograí is tábhachtaí sa gcontae ó thaobh na turasóireachta de, a deir Breandán Ó Beirn, ach níl an aird cheart á thabhairt ag Comhairle Chontae Dhún na nGall air a deir sé.
