Tá Duais Nobel na bliana seo do chúrsaí leighis agus fiseolaíochta á roinnt idir an t-ollamh Éireannach William C.Campbell, an t-ollamh ón tSeapáin Satoshi Omura, agus an t-eolaí Síneach Youyou Tu.
Bronnadh leath na duaise ar an Uasal Campbell agus ar an Uasal Omura as ucht a gcuid oibre ar dhruga nua in aghaidh na n-aicidí a tharraingíonn seadáin cruinnphéiste.
Bíonn na seadáin seo ina gcionsiocair le daoine a fhágáil caoch.
Is i Ráth Mealtain i gCo.Dhún na nGall a rugadh William Campbell agus bhí sé i mbun staidéir i gColáiste na Tríonóide i mBaile Átha Cliath.
Tá sé anois ina ollamh ag plé le cúrsaí taighde in Ollscoil Drew i Madison i Stát New Jersey.
Bronnadh an leath eile den duais ar Youyou Tu as a cuid oibre siúd maidir le leigheas nua in aghaidh an ghalair maláire.
