Dúirt Marie Farrell san Ard-Chúirt ar maidin gur dhúirt Gardaí gurbh é Ian Bailey a mharaigh Sophie Tuscan Du Plantier.
Taispeánadh físeán de Bailey di agus dúirt sí leis na Gardaí nárbh é Bailey a bhí ann. Ach dúirt Gardaí leí go gcaithfeadh sí a rá go raibh sé sa cheantar úd mar gurb eisean a mharaigh Tuscan Du Plantier agus go maródh sé duine éigin eile arís.
Dúradh léi nach mbeadh aon chás cúirte i gceist agus nach mbeadh uirthi ach ráiteas dhá-líne a shíniú.
D'inis sí do na Gardaí faoi fhear a fheiscint dhá bhabhta ach choinnigh sí an tríú babhta anaithnid mar nár theastaigh uaithi go bhfaigheadh a fear céile amach cá raibh sí.
Dúirt na Gardaí léi áfach go raibh fhios acu gurb í a ghlaoigh go hanaithnid ach nach n-inseodh siad aon ní dá fear céile.
Thoiligh sí an ráiteas a shíniú mar go raibh sí buartha go bhfaigheadh a fear céile amach agus gur cheap sí go gcuirfeadh a toiliú deireadh leis an scéal.
Shínigh sí suas le hocht leathanach lom san iomlán.
Dúirt sí freisin gur tugadh barrántas di nach nglacfadh na Gardaí cás in aghaidh a fir chéile faoi árachas gluaisteáin.
Tá Marie Farrell ag tabhairt fianaise i gcás dlí atá á chur ag Ian Bailey ar an Stát agus ar Ghardaí ar chúis gur gabhadh go héagórach é faoi dhúnmharú Sophie Tuscan Du Plantier i mí na Nollag 1996 in iarthar Chorcaí.
Séanann an Stát na líomhaintí.
