Beidh Adhmhaidin dhá scór bliain ar an aer ar RTÉ Raidió na Gaeltachta ar Luan Cásca, an 6ú Aibreán. Chun comóradh a dhéanamh ar an gcloch mhíle seo, caithfidh láithreoir an chláir, Gormfhlaith Ní Thuairisg, chomh maith le roinnt aoichainteoirí, súil siar ar an bhliain 1986. Beidh Alan Dukes, an chéad aoi a bhí ag Adhmhaidin ar an gcéad chlár a craoladh riamh ar an 6ú Aibreán 1986 ar ais sa stiúideo.
Tabharfaidh Seán Ó Cuirreáin agus Máirtín Ó Catháin, beirt de na léiritheoirí a d'ullmhaigh an chéad eagrán riamh éisteoirí siar ar bhóithrín na smaointe. Pléifidh siad na hathruithe móra atá tagtha ar an tír agus ar an domhan mór ó shin. Beidh deis ag na héisteoirí roinnt blúiríní suimiúla ó chláracha ón bhliain 1986 a chloisteáil arís chomh maith.
Beidh Adhmhaidin ag dul ar an mbóthar, agus cláracha speisialta á gcraoladh ag Gormfhlaith agus a foireann ó thuaidh, ó dheas agus ón Ardchathair sna míonna amach romhainn mar chuid den gcomóradh.
Dúirt Gearóid Mac Donnncha, Ceannaire RTÉ Raidió na Gaeltachta: "Chuile mhaidin le dhá scór bliain bhí Adhmhaidin lárnach i saol na Gaeltachta agus na Gaeilge mar phríomhfhoinse nuachta, eolais agus díospóireachta. Ó chuaigh an clár ar an aer den chéad uair i 1986, chuaigh lucht léirithe an chláir i ngleic le scéalta náisiúnta, idirnáisiúnta agus Gaeltachta, ag déanamh agallaimh, ag tuairisciú, ag cur anailís ar fáil, agus ag cur guthanna ár bpobal ar an aer. Ba mhaith liom buíochas ó chroí a ghlacadh le gach aon duine a d'oibrigh le gairmiúlacht agus díograis ar an gclár, ina measc láithreoirí, léiritheoirí, tuairisceoirí, Reachtairí Rúnaíochta agus criú teicniúil. Tá buíochas ar leith ag dul dóibh siúd a thug a gcuid ama agus a tháinig ar an aer linn, a chuaigh faoi agallamh nó a rinne anailís ar an méid a bhí ag titim amach sa saol. Ach tá an buíochas is mó ag dul dár gcuid éisteoirí dílse a spreagann muid agus a mheabhraíonn dúinn an tábhacht a bhaineann le seirbhís phoiblí i gcroílár phobal na Gaeltachta agus na Gaeilge. Agus muid ag breathnú chun cinn, tá a fhios agam go leanfaidh Adhmhaidin agus an criú atá ag obair ar an gclár leis an obair thábhachtach atá le déanamh. Ba mhaith liom comhghairdeas a dhéanamh leo agus gach rath a ghuí orthu."
Dúirt Gormfhlaith Ní Thuairisg, láithreoir Adhmhaidin: "Tá muide i bhfoireann Adhmhaidin bródúil agus buíoch as an éacht a rinne meitheal Adhmhaidin i 1986. Leag siad an bhunchloch do chlúdach nuachta agus cúrsaí reatha sa gcraoltóireacht Ghaeilge agus ní raibh a sárú le fáil ó shin. Tá na luachanna a bhí acusan ag an am ag croílár Adhmhaidin sa lá atá inniu ann - béim ar leith ar scéalta úra Gaeltachta, irisireoireacht chróga chothrom agus clúdach cuimsitheach, eolach ar chúrsaí nuachta na Gaeltachta, na tíre agus na cruinne."
