Tá iarrtha ag an Aire Gnóthaí Eachtracha, Trádála agus Cosanta Helen McEntee ar an gCoimisiún Eorpach moltaí a dhéanamh gan a thuilleadh moille maidir le cosc a chur ar thrádáil le háitribh mhídhleathacha Iosraelacha i gcríocha Palaistíneacha.
Tá Helen McEntee sa Bhruiséil, áit a bhfuil sí ag glacadh páirt i gcruinniu de Chomhairle Gnóthaí Eachtracha um Thrádáil an Aontais Eorpaigh.
Slándáil eacnamaíochta an Aontais atá faoi chaibidil sa chruinniú.
I ráiteas, dúirt an tAire McEntee go bhfuil Éire ar cheann de dheich mballstát atá tar éis iarraidh ar an gCoimisiún Eorpach moltaí a dhéanamh maidir le trádáil le háitribh Iosraelacha sna críocha gafa.
Ní féidir leis an Aontas Eorpach leanacht ar aghaidh ag caint ar an ord idirnáisiúnta a bheith faoi réir ag rialacha agus trádáil a dhéanamh leis na háitribh sin ag an am céanna, arsa sí.
Tá páirtithe an fhreasúra fós ag éileamh ar an Rialtas seirbhísí a chur san áireamh sa Bhille um Chríocha faoi Fhorghabháil atá le hachtú, a deir an Rialtas, as seo go ceann cúpla seachtain.
De réir an bhille sin, is coir a bheadh ann iarracht a dhéanamh earraí ó áitribh Iosraelacha a thabhairt isteach sa tír seo, ní áirítear seirbhísí.
Creideann an Rialtas, ní hionann agus an freasúra, nach mbeadh bonn láidir dlíthiúil faoi chosc a chur ar sheirbhísí agus go bhféadfaí a dhúshlán a thabhairt i gcúirt éigin.
Nuacht agus Cúrsaí Reatha RTÉ
