Tá sé fógartha ag Uachtarán na Stát Aontaithe Donald Trump go bhfuil síneadh gan ceapadh lae curtha aige leis an sos cogaidh idir na Stáit Aontaithe agus an Iaráin a raibh deireadh in ainm agus teacht leis amárach.
Deis a thabhairt d'ionadaithe ón dá thír teacht le chéile an athuair sa Phacastáin faoi thuairim comhráite síochána is siocair lena chinneadh, a dúirt Trump.
Dealraíonn sé, ámh, gur uaidh féin a rinne sé an cinneadh agus nach raibh an Iaráin bainteach leis, ná Iosrael go deimhin, a chomhghuaillí cogaidh.
Thug Trump le fios freisin go leanfadh na Meiriceánaigh den bhac atá siad a chur ar longa seoladh trí Chaolas Hormuz i ndeisceart na hIaráine.
Ós gníomh cogaidh é sin, dar leis an Iaráin, is braschaint gan bhrí ag Trump an fógra is deireanaí uaidh.
Ina dhiaidh sin féin, shaoirsigh ola ar na margaí idirnáisiúnta i bhfianaise a ndúirt sé.
Mar leis an gcogaíocht féin agus a bhfuil ann de dhoirteadh fola agus de scrios, cad eile, tuairiscítear gur maraíodh na mílte sibhialtach san Iaráin le dhá mhí agus gur cuireadh uimhir gan chuntas as a mbailte.
Sa Liobáin, tá 2,500 duine ar a laghad maraithe ag fórsaí míleata Iosrael a bhfuil fonn cogaidh Trump tapaithe acu chun an tír sin a bhuamáil go tréan an athuair agus chun seilbh a ghabháil ar a thuilleadh talún ann.
Tá sos cogaidh deich lá i bhfeidhm sa Liobáin ón Aoine seo caite agus tá ionadaithe ón tír sin agus ó Iosrael le teacht le chéile in Washington amárach le téarmaí na síochána a phlé.
Nuacht agus Cúrsaí Reatha RTÉ
