Tá fainic curtha ag Feidhmeannacht na Seirbhíse Sláinte ar an dream atá i mbun agóide i gcoinne an ardaithe ar chostais bhreosla gan na bealaí isteach chuig ospidéil na tíre a bhlocáil le go mbeidh othair – go háirithe iad siúd atá leochailleach – in ann cúram leighis a fháil.
Thug Príomhfheidhmeannach FSS, Anne O'Connor, agus an tAire Sláinte, Jennifer Carroll MacNeil, le fios go bhfuil sé ríthábhachtach go mbeidh othair in ann freastal ar a gcoinní agus nach mbeidh aon bhac ar othair ná ar oibrithe sláinte dul chomh fada le hospidéil nó le hionaid chúram leighis na tíre.
Is am íogair é d’aon duine, a dúirt siad, freastal ar ospidéal nó ar ionad cúram leighis.
Tá sé iarrtha ar an lucht agóide acu meas a léiriú ar othair a bhfuil cúram leighis de dhíth orthu agus gan aon bhac a chur orthu.
Dúirt an Taoiseach inniu go bhfuil an lucht agóide ag dul thar fóir agus nach modh cothrom agóidíochta é infreastruchtúr riachtanach a chur faoi imshuí.
Tá stáisiúin bhreosla, scaglanna agus bóithre na tíre faoi imshuí ag conbhua feithiclí don tríú lá as a chéile inniu. Agus tá iarrtha ar Óglaigh na hÉireann cúnamh a thabhairt don Gharda Síochána na feithiclí a bhaint d’áiteanna a bhfuil infreastruchtúr riachtanach blocáilte.
Faoin dlí, tá sé de chead ag na Gardaí cúnamh na bhFórsaí Cosanta a lorg chun a gcumhachtaí sibhialta a chur i bhfeidhm.
