Tá foláireamh buí gaoithe fógartha ag Met Éireann sa tír ar fad deireadh seachtaine seo na Cásca.
Deir na meitéareolaithe gur gaoth aneas agus gaoth aniar – ceann i ndiaidh an chinn eile – a dhéanfas an díobháil.
Aneas a shéidfeas an gála ar an gcéad ásc Dé Sathairn ach faoi dhorchú an lae is ón aird aniar a bheas sí ag teacht.
Beidh feidhm leis an bhfoláireamh buí idir 3 a chlog tráthnóna Dé Sathairn agus an mheán oíche Dé Domhnaigh.
Deir na meitéareolaithe go mbeidh an sáile ag tonnadh isteach ar na cladaí in áiteanna, go háirithe san áit a mbeidh lán mara rabharta.
Is é is dóichí go leagfar crainn freisin agus go scuabfar mionbhach chun bealaigh, a deirid.
Is minic an fhearthainn ag coinneáil cuideachta leis an ngaoth an tráth seo bliana, laethanta na riabhaí, agus is amhlaidh a bheas an deireadh seachtaine seo, cá hionadh sin?
Beidh foláireamh buí gaoithe fógartha i sé chontae an Tuaiscirt chomh maith ach is idir 2 a chlog tráthnóna Dé Sathairn agus 2 a chlog ar maidin Dé Domhnaigh a bheas feidhm leis siúd.
Is é 'Dave' atá baiste ar an stoirm ag meitéareolaithe in Éirinn, sa Bhreatain agus san Ísiltír.
Nuacht agus Cúrsaí Reatha RTÉ
