Ionsaíodh roinnt tíortha i Murascaill na Peirse thar oíche nuair a scaoil an Iaráin dróin agus diúracáin leo.
I measc na dtíortha a buaileadh, tá Aontas na nÉimíríochtaí Arabacha, An Araib Shádach, Bairéin agus an Chuáit.
Sa Chuáit, tuairiscítear gur cuireadh scaglann ola ollmhór trí thine de bharr na n-ionsaithe.
Deir Forsaí Cosanta Iosrael, an IDF, gur bhuail siad spriocanna i ndeisceart na Siria thar oíche, ina measc ionad ceannais agus bunáit mhíleata de chuid réimeas na tíre sin.
Thar oíche, chualathas pléascanna san Iarúsailéim agus i bpríomhchathair na hIaráine,Tehran.
Deir príomh-aire Iosrael, Benjamin Netanyahu, go bhfuil an lámh in uachtar ag a thír agus ag na Stáit Aontaithe sa chogadh i gcoinne na hIaráine.
Deir Arm na hIaráine go bhfuil an tír ag leanúint uirthi ag táirgeadh diúracán in ainneoin na n-ionsaithe ó Iosrael agus na Stáit Aontaithe.
Dúradh an méid seo i ndiaidh do phríomh-aire Iosrael a thabhairt le fios nach raibh ar chumas na hIaráine a leithéid a dhéanamh níos mó.
Tá praghasanna ola agus gáis imithe in airde go mór de dheasca na n-ionsaithe ar bhonneagar fuinnimh.
Bhí cruinniú ag ceannairí an Aontais Eorpaigh sa Bhruiséil inniu agus iad ag iarraidh go gcuirfí beartais shealadacha i bhfeidhm in iarracht cabhrú le custaiméirí dul i ngleic le praghasanna fuinnimh atá ag imeacht in airde go mór mar thoradh ar an gcogadh san Iaráin.
Inniu mhaígh Oll-cheannaire na hIaráine Mojtaba Khamenei go bhfuil an lámh in uachtar faighte acu ar naimhde na tíre.
Idir an dá linn, thug Uachtarán Mheiriceá, Donald Trump, "cladhairí" ar chomhghuaillithe NATO i dteachtaireacht dá chuid ar na meáin shóisialta agus dúirt sé go mbeadh sé an-éasca acu cabhrú le Caolas Hormuz i Murascaill na Peirsia a oscailt aríst.
Tuairiscítear go bhfuil Meiriceá ag smaoineamh ar níos mó fórsaí a sheoladh go dtí an réigiún, agus go bhfuil Donald Trump ag i mbun machnaimh ar shlite chun brú a chur ar an Iaráin Caolas Hormuz a oscailt arís, áit a dtéann timpeall cúigiú cuid d'ola an domhain tríd gach lá.
