Tá trí fholáireamh bhuí fógartha ag Met Éireann agus garbhshíon geallta in áiteanna amárach agus arú amárach.
Is foláireamh gaoithe móire atá fógartha i gcúig chontae cois cósta, mar atá, Baile Átha Cliath, Lú, An Mhí, Cill Mhantáin agus Loch Garman.
Beidh an t-uisce ag tonnadh isteach ar na cladaí sna háiteanna sin, leagfar crainn agus scuabfar mionbhach chun bealaigh, a deir na meitéareolaithe.
Tiocfaidh feidhm leis an bhfoláireamh ag 11 a chlog oíche amárach agus tiocfaidh deireadh leis ag 1 a chlog am lóin Dé Céadaoin.
Tá foláireamh fearthainne fógartha freisin i dtrí cinn de na contaetha céanna – Baile Átha Cliath, Cill Mhantáin agus Loch Garman – chomh maith le Ceatharlach, Cill Chainnigh, Corcaigh agus Port Láirge.
Beidh feidhm leis an bhfoláireamh sin idir 11 a chlog oíche amárach agus 11 a chlog oíche Dé Céadaoin.
Tá baol ann go mbeidh tuilte sna seacht gcontae sin, go háirithe san áit a bhfuil an talamh ar maos cheana agus san áit a ndeachaigh aibhneacha thar a mbruacha le gairid.
Is foláireamh fearthainne agus sneachta araon atá fógartha i dtrí chontae san iarthuaisceart, mar atá, Dún na nGall, Liatroim agus Sligeach.
Tiocfaidh feidhm leis an bhfoláireamh sin ag 2 a chlog ar maidin Dé Céadaoin agus tiocfaidh deireadh leis ag 2 a chlog tráthnóna an lá céanna.
Déanfaidh sé flichshneachta sa taobh sin tíre ina dhiaidh sin.
Tá foláireamh buí oighir fógartha ag na meitéareolaithe sa Tuaisceart, a mbeidh feidhm leis óna 8 a chlog anocht go dtí 10 a chlog ar maidin amárach.
Mar is iondúil, comhairlítear do dhaoine, go háirithe tiománaithe, a bheith stuama agus gan dul i nguais.
Nuacht agus Cúrsaí Reatha RTÉ
