Tá báisteach throm, baol tuilte agus gaoth láidir geallta do chuid mhaith ceantar sa tír inniu agus i gcaitheamh an deireadh seachtaine.
Stoirm Claudia amuigh san Aigéan Atlantach faoi ndear cuid mhaith den doineann a deir oifig Met Éireann.
Tá stádas flannbhuí báistí i bhfeidhm inniu ó mheánlae amach do chontaetha Bhaile Átha Cliath,Loch Garman agus Chill Mhantáin.
Deirtear go bhféadfadh fuarlaigh móra a bheith in áiteanna áirithe.
Beidh cúrsaí taistil contúirteach freisin agus iarrtar ar thiománaithe a bheith cúramach.
Leanfaidh an stádas flannbhuí seo go dtí a 8 a chlog maidin amárach.
Deirtear gurb iad na tailte arda agus ceantair ar bheagán foscaidh is measa a bheidh buailte.
Tá stádas buí báistí eisithe freisin do 13 contae agus fanfaidh sé sin i bhfeidhm go dtína 9 a'chlog maidin amárach.
I gceist leis sin tá Ceatharlach,Baile Átha Cliath,Cill Dara, Cill Chainnigh,Lú, An Mhí, Loch Garman,Cill Mhantáin,Corcaigh, Ciarraí, Luimneach,Tiobraid Árann agus Port Láirge.
Arís iarrtar ar thiománaithe a bheith cúramach.
Anuas ar sin tá foláireamh gaoithe stádas buí eisithe do Chontaetha Bhaile Átha Cliath,Lú, na Mí, Loch Garman agus Chill Mhantáin.
Ó mheánlae inniu go dtí 4 a'chlog maidin amárach an tréimhse atá luaite leis sin.
Tá fainic curtha ag Bord Soláthar an Leictreachais freisin ar dhaoine a bheith cúramach sa chás is go mbíonn línte aibhléise leagtha.
Iarrtar ar dhaoine freisin a bheadh ag úsáid modhanna taistil poiblí súil a choinneáil ar amchláir ar fhaitíos go mbeadh seirbhísí curtha ar ceal.
