Tá ordú tugtha ag an Roinn Talmhaíochta éanlaith chlóis agus éin atá i ngéibheann a choinneáil i gcróite faoi dhíon ón Luan seo chugainn agus imní ar lucht tréidliachta faoin bhfliú éanúil.
Tá srianta i bhfeidhm cheana féin i gCo Cheatharlach, áit a bhfuil ráig den fhliú éanúil ar fheirm turcaithe.
Tá ceantar cosanta agus ceantar faireachais bunaithe timpeall na feirme sin le súil an ráig a choinneáil faoi smacht.
Tri chiliméadar ar a fhad i ngach treo atá an ceantar cosanta, deich gciliméadar ar a fhad atá an ceantar faireachais.
Tuigtear gur thart ar 500 turcaí atá ar an bhfeirm agus gurb é an tréithchineál H5N1 den fhliú éanúil atá orthu.
Chomh maith le héanlaith chlóis agus éin i ngéibheann, áiríodh an galar a bheith tolgtha ag thart ar dhá scór éan fiáin ar fud an Stáit go dtí seo i mbliana.
Sa Tuaisceart, tiocfaidh feidhm ó amárach le hordú atá tugtha ag na húdaráis ansin éanlaith chlóis agus éin atá i ngéibheann a choinneáil istigh.
Dá dhonacht é i measc éan, níor tuairiscíodh riamh go dtí seo ach an fíor-chorrchás den fhliú éanúil a bheith tolgtha ag daonnaithe.
Nuacht agus Cúrsaí Reatha RTÉ
