Táthar ag iarraidh ar thuismitheoirí na tíre páirt a ghlacadh i mórshuirbhé nua náisiúnta faoin gcineál bunscoile a mb'fhearr leo a gclann a chur chuici.
Éiteas nó pátrúnacht na scoile atá i gceist, bíodh sin aonchreidmheach, ilchreidmheach, neamhchreidmheach, Gaelach, gallda, measctha ó thaobh gnéis de agus mar sin siar.
Is é an Roinn Oideachais atá ag eagrú an tsuirbhé a bhfuiltear ag iarraidh ar thuismitheoirí 826,000 leanbh, nó a gcaomhnóirí, páirt a ghlacadh ann.
Tá ceistneoir ar líne le seoladh chuig 493,000 líon tí as seo go dtí an 16 Nollaig arbh é an aidhm atá leis, dar leis an Roinn, léargas barántúil a fháil ar an gcineál scolaíochta a mb'fhearr le tuismitheoirí go bhfaigheadh a gclann.
Dúirt an Roinn go mbainfí leas as torthaí an tsuirbhé le scolaíocht "níos ilghnéithí" a sholáthar san am le teacht, scolaíocht "ar léiriú [cothrom] a bheadh ann ar shuáilcí agus riachtanais Éire na linne seo".
Iarrfar ar mhúinteoirí agus ar bhoird bainistíochta scoileanna ceistneoir eile a fhreagairt ar an ábhar céanna.
Ní suirbhé gan chonspóid é, áfach.
Is é an Foras Pátrúnachta an pátrún is mó in Éirinn ar scoileanna lán-Ghaeilge agus tá imní ar an eagraíocht faoina bhfuil sa suirbhé maidir le hoideachas lán-Ghaeilge.
Dar leis an bhForas Pátrúnachta go bhfuil ceist chasta an oideachais lán-Ghaeilge curtha i láthair sa suirbhé go róshimplí agus go bhféadfadh a lán tuismitheoirí freagra diúltach a thabhairt ina leith de cheal na bhfíricí ar fad.
Nuacht agus Cúrsaí Reatha RTÉ
