Is í Catherine Connolly an chéad uachtarán eile ar an Stát.
Bhí bua slachtmhar ag an iarrthóir neamhspléach seo ó chathair na Gaillimhe, breis is 63% den phobal vótála ag tacú léi i dtoghchán an lae inné.
As na 43 dáilcheantar inar caitheadh vótaí, bhuaigh an Teachta Dála Connolly 42 díobh agus í ag gnóthú mórchuid na vótaí.
Ba é dáilcheantar Chabhán-Mhuineachán an t-aon cheann a d'éalaigh uaithi,iarrthóir Fhine Gael Heather Humphreys ag fáil an cheann is fearr uirthi ina dáilcheantar féin.
Ina haitheasc, inar labhair sí ar dtús i nGaeilge ar feadh breis is 3 nóiméad, dúirt Catherine Connolly go mbeadh sí ina huachtarán do chuile shaoránach sa tír.
Gheall sí freisin go labhródh sí amach ar ábhair ar leag sí béim orthu ina feachtas toghchánaíochta a bhí sa tsiúl ó mhí Iúil.
'Beidh mé i mo ghlór don tsíochán' a dúirt sí, 'agus is glór é a chuirfidh le polasaí neodrachta na hÉireann'.
Tá a bua tréaslaithe léi ag an Uachtarán reatha, Michael D Higgins, An Taoiseach Micheál Martin agus An Tánaiste Simon Harris.
Chuir Heather Humphreys a comhghairdeachas in iúl freisin.
Breis is 900,000 vóta a fuair Catherine Connolly, 63% den phobal ag léiriú tacaíochta di.
Bhain Catherine Connolly Caisleán Bhaile Átha Cliath amach go caithréimeach níos túisce tráthnóna.
Ba ansin a fógraíodh toradh oifigiúil an toghcháin seo go gairid roimh 7.30i.n.
29.5% den sciar a fuair Heather Humphreys.
7.2% a fuair Jim Gavin ó Fhianna Fáil, an t-iarrthóir a tharraing amach as an rás roinnt seachtainí ó shin.
45.8% den phobal vótála a chuaigh ag na bothanna inné.
Díol suntais agus imní nach beag go raibh 13% de na vótaí sin a caitheadh neamhbhailí, sa bhreis ar 213,000 vóta.
Figiúir suntasach nuair a chuirtear i gcomparáid é leis an 18,000 vóta a bhí neamhbhailí sa toghchán deiridh i 2018.
Dúirt an Tánaiste,Simon Harris nach bhféadfaí neamhaird a dhéanamh de seo, gur lón machnaimh a bhí ann don Rialtas agus gur díol suntais freisin na teachtaireachtaí a fágadh ar na páipéir ballóide agus daoine ag milleadh na vótaí.
