Sa Phríomh-Chúirt Choiriúil i gCorcaigh, ciontaíodh an dara fear i ndúnmharú Kieran Quilligan, fear 47 bliain d'aois a bhfuarthas a chnámhiarsmaí i mála i measc na muineacha in áit iargúlta in oirthear an chontae sin anuraidh.
Is é an té a ciontaíodh inniu Luke Taylor, 27 bliain, as Lána na Silíní, an Dúcharraig, i gCorcaigh.
Sa chúirt chéanna inné, ciontaíodh sa dúnmharú Niall Long, 33 bliain, as Clós Mhichíl, Machain, i gCorcaigh.
Bhí Kieran Quilligan ar iarraidh ón 1 Meán Fómhair 2024 agus fuarthas a chnámhiarsmaí cúig mhí ina dhiaidh sin i gcumar i gceantar Ros Tialláin.
Is cosúil gur buaileadh go trom é le casúr, nó acra mar é, agus bhí go leor dá chnámha briste.
Dúradh sa chúirt, áfach, nach rabhthas in ann a dheimhniú cad go baileach ba thrúig bháis dó mar gheall go raibh an corp lofa faoin am a fuarthas é.
Dúradh freisin gur cosúil gur beart díoltais a bhí sa dúnmharú mar go raibh drugaí goidte ag Kieran Quilligan ó Niall Long.
Cuireadh an bheirt chiontach siar faoi choinneáil go dtí Dé Céadaoin seo chugainn, tráth a ghearrfar príosún saoil orthu mar atá sainordaithe i gcásanna dúnmharaithe.
Nuacht agus Cúrsaí Reatha RTÉ
