Tugadh fear 23 bliain d'aois os comhair Chúirt Dúiche Chnoc na Seamar inniu agus é cúisithe i gcoirloscadh agus i gcionta sceimhlitheoireachta.
Sin é Abdullah Khan atá cúisithe cheana i nGarda a shá le scian i lár Bhaile Átha Cliath i mí Iúil seo caite agus ar cuireadh sceimhlitheoireacht ina leith inniu freisin i dtaca leis an ionsaí sin.
Cuireadh ina leith chomh maith go ndearna sé ionsaí coirloiscthe ar theach ósta an Black Forge i nDroimeanach, ar le Conor McGregor é, ceithre lá roimh an ionsaí ar an nGarda.
Dúradh sa chúirt inniu gur threoraigh an Stiúrthóir Ionchúiseamh Poiblí Abdullah Khan a chur ar a thriail sa Chúirt Choiriúil Speisialta.
Cuireadh an cúisí siar faoi choinneáil agus tabharfar os comhair na cúirte arís é an tseachtain seo chugainn.
Níl cead seoladh baile Abdullah Khan a fhoilsiú ar chúinsí slándála.
Nuacht agus Cúrsaí Reatha RTÉ
