Tuigtear go bhfuil an comhlacht cógaisíochta as an Danmhairg Novo Nordisk le tuairim is 75 fostaí a ligean chun siúil ón ionad déantúsaíochta atá acu i bhFearann na Manach i mBaile Átha Luain.
É sin tar éis do thart ar 40 fostaí eile i bhFearann na Manach glacadh le hiomarcaíocht dheonach le roinnt seachtainí.
Deir Novo Nordisk go bhfuil ciorruithe á gcur i bhfeidhm acu ar fud an domhain agus go bhfuil rún acu 9,000 oibrí san iomlán a ligean ar scor go buan.
Sin an dochar, ach ar thaobh an tsochair tá comhlacht eile atá bainteach leis an earnáil cógaisíochta le suas le 140 post nua a chur ar fáil i nGaillimh as seo go ceann trí bliana.
Is in ionad an chomhlachta Complete Laboratory Solutions (CLS) ar Bhóthar Thuama i gcathair na Gaillimhe a chruthófar na poist nua, áit a bhfuil 260 duine ag obair cheana féin.
Táthar ag cur le hobair CLS i nGaillimh tar éis don chomhlacht agus don Ghníomhaireacht Forbartha Tionscail araon €9 milliún a infheistiú in oiliúint na foirne ansin.
Cuireann CLS seirbhísí saotharlainne ar fáil do chomhlachtaí cógaisíochta, tárigí leighis, bia agus comhshaoil.
Comhlacht Éireannach is ea CLS, a bunaíodh 30 bliain ó shin, agus tá sé ar an gcomhlacht is mó dá chineál sa tír.
Nuacht agus Cúrsaí Reatha RTÉ
