Tá an t-iarchomhairleoir polaitíochta le Fianna Fáil Martin Mansergh tar éis bháis. Státseirbhíseach, Seanadóir, Teachta Dála agus Aire Stáit ab ea Martin Mansergh chomh maith.
Bhí sé 78 bliain d'aois agus cailleadh é go tobann agus é ar cuairt ar réigiún an tSahára san Afraic.
Cé gur i Sasana a rugadh agus a tógadh é, ba as Tiobraid Árann a athair – an staraí aitheanta Nicholas Mansergh.
Mar chomhairleoir polaitíochta ag triúr Taoiseach – Cathal Ó hEochaidh, Albert Reyolds agus Bertie Ahern – bhí baint nár bheag ag Martin Mansergh leis an bpróiseas síochána sa Tuaisceart a chur sa siúl agus lena chur i gcrích, arbh é Comhaontú Aoine an Chéasta i 1998 a bhuaic.
I gcaitheamh na mblianta íogaire sin, labhair sé thar ceann Rialtas na hÉireann le poblachtaigh, le náisiúnaithe eile agus le hidirghabhálaithe ó thuaidh agus chuir sé comhairle ar pholaiteoirí sinsearacha i bhFianna Fáil faoin mbealach is fearr le dul i gceann an phróisis síochána.
Agus bonn réasúnta láidir faoin tsíocháin ó thuaidh ar deireadh, chuir Martin Mansergh a ainm chun cinn mar iarrthóir san olltoghchán ó dheas in 2002.
Cé gur theip air, chaith sé cúig bliana ina Sheanadóir nó gur bhuaigh sé suíochán ar an dara hiarraidh i ndáilcheantar Thiobraid Árann Theas in 2007.
Ceapadh ina Aire Stáit é agus bhí cúraimí éagsúla air nó gur chaill sé a shuíochán san olltogchán in 2011.
Tá ómós tugtha do Martin Mansergh ag polaiteoirí ó pháirtithe éagsúla, lena n-áirítear an Taoiseach Micheál Martin, iarcheannaire Shinn Féin Gerry Adams agus an Tánaiste Simon Harris.
Maireann a bhean chéile Elizabeth agus a chúigear clainne.
Nuacht agus Cúrsaí Reatha RTÉ
