Tá an Iodáil agus an Spáinn le longa cogaidh a chur go hoirthear na Meánmhara le cabhlach idirnáisiúnta fóirithinte ar son Gaza a chosaint ar ionsaithe drón atá fórsaí míleata Iosrael a dhéanamh uirthi.
Tá daoine as 45 tír ar an 51 soitheach atá rannpháirteach sa chabhlach fóirithinte atá suite ó dheas ón gCréit faoi láthair.
D'fhógair Príomh-Aire na Spáinne Pedro Sánchez go seolfadh long chogaidh as calafort Cartagena in oirdheisceart na tíre sin inniu le tacú leis an gcabhlach fóirithinte agus le daoine a tharrtháil dá mba ghá.
Dúirt sé go raibh de cheart ag saoránaigh na Spáinne seoladh go sábháilte sa Mheánmhuir agus d'éiligh sé ar Iosrael aird a thabhairt ar an dlí idirnáisiúnta.
Cháin Aire Cosanta na hIodáile Guido Crosetto na ruathair atá na hIosraelaigh a dhéanamh ar an gcabhlach fóirithinte agus dhearbhaigh sé go dtiocfadh an dara long chogaidh ón tír sin i gcabhair uirthi.
D'fhógair na hIodálaigh inné go raibh siad le frigéad dá gcuid a chur chomh fada leis an gcabhlach chun í a chosaint ar na dróin.
Tá roinnt ionsaithe drón déanta ar an gcabhlach ó d'fhág sí Barcelona ar an 31 Lúnasa.
Tá os cionn scór Éireannach rannpháirteach sa chabhlach idirnáisiúnta fóirithinte, an Seanadóir Chris Andrews ó Shinn Féin ina measc.
Nuacht agus Cúrsaí Reatha RTÉ
