Bhásaigh fear sna 20aí ar maidin tar éis do charr agus veain bualadh faoina chéile ar an teorainn idir Ghaillimh agus Mhaigh Eo.
Ar an N17 gar don Droim a tharla an eachtra, go luath tar éis a 8 inniu.
Fógraíodh ar an láthair go raibh tiománaí an chairr marbh. Déanfar scrúdú iarbháis ar a chorp san Ospidéal Ollscoile, Gaillimh.
Gortaíodh tiománaí an veain go dona san eachtra agus tugadh ar heileacaptar chuig an ospidéal. Fear sna 50aí é siúd.
Tá an bóthar idir Bhaile an Mhuilinn, Gaillimh agus Baile an Daighin, Maigh Eo dúnta le gur féidir scrúdú dlíeolaíoch a dhéanamh ar an láthair.
Tá an trácht á chur ar malairt slí ar an taobh ó thuaidh de Thuaim agus i mBaile an Daighin.
Tá finnéithe don eachtra á lorg ag na Gardaí, go háirithe aon duine a bhí ag dul an bhealaigh idir 7:45 agus 8:45 ar maidin agus aon duine a bhfuil físeán daiscam acu.
Is féidir dul i dteagmháil le Gardaí Thuama ar 093 70840, ar Líne Rúnda an Gharda 1800 666 111, nó chuig stáisiún ar bith eile Garda.
