Tá Iosrael tar éis ionsaí a dhéanamh ar cheannasaíocht Hamas i príomhchathair Chatar, Doha. Deir oifigigh de chuid Hamas gur díríodh ar fhoireann idirbheartaíochta Hamas san ionsaí, le linn do na ceannairí a bheith i mbun cruinnithe.
Bhí pléascthaí le cloisteáil, agus deatach le feiceáil os cionn Doha, de réir finnéithe a labhair le Reuters.
Tá sé deimhnithe ag Iosrael freisin gurbh iad ceannairí Hamas a bhí mar sprioc acu san ionsaí, Khalil al-Hayya, ceannaire Hamas in Gaza ina measc. I ráiteas a eisíodh ar ball, deir Hamas gur tháinig na ceannairí slán ón ionsaí.
I ráiteas a d'eisigh fórsaí Iosrael ar ball, dúirt siad:
"Le blianta anuas, bhí sceimhlitheoireacht Hamas faoi stiúir na gceannairí seo. B’iadsan a bhí freagrach as an slad ar 7 Deireadh Fómhair 2023. Is iadsan atá ag stiúradh agus ag bainistiú an chogaidh i gcoinne Iosrael. Sula ndearnadh an t-ionsaí seo, rinneamar oiread agus ba chuí leis an mbaol do shibhialtaigh in Doha a mhaolú. Ionsaí spriocdhírithe a bhí ann."
Ach deir Roinn Ghnóthaí Eachtracha Chatar gur léir gur sárú é an t-ionsaí seo ar an dlí idirnáisiúnta. "Ní chuirfimid suas leis an iompar meargánta seo de chuid Iosrael", a dúirt siad. "Bíonn siad ag cur shlándáil an réigiúin i mbaol de shíor." Thug na húdaráis in Doha le fios freisin gur "bagairt thromchúiseach" iad na hIosraelaigh do mhuintir Chatar.
