Tá fiosrú ar bun ag na Gardaí faoi chuid den treallamh a scriosadh i gclós súgartha ar an taobh ó dheas den ardchathair i dtine aréir a cheaptar a lasadh go mailíseach.
Tugadh faoi deara an sleamhnán mór gasúr tré thine i gclós spraoi Pháirc Sheáin Uí Mhóra i nDumhach Thrá thart ar 9.40 aréir.
Cuireadh fios ar an mBriogáid Dóiteáin agus ar na Gardaí agus ceansaíodh an loscadh gan éinne a bheith gortaithe.
"Coirloscadh eile, an ceann is measa fós, ag loitiméirí ainrianta atá ag tabhairt an dá mhéir dá bpobal féin" a thug James Geoghegan, TD de chuid Fhine Gael i gCuan Bhaile Átha Cliath Theas, ar an méid a tharla.
Deir sé go mbeidh "breis is €100,000" i gceist le caoi a chur ar an suíomh.
Dúirt an Teachta Geoghegan go raibh freagra gasta ag teastáil ó thaobh póilíniú pobail agus ó thaobh athchóiriú an ionaid spraoi.
"Tá an pobal seo i bhfad níos treallúsaí ná na loitiméirí" a dúirt sé.
Deir na Gardaí gur fiosrú faoi choirloscadh atá sa tsiúl acu.
Le coicís anuas tá drochbhail fágtha freisin ag tine ar chlósanna súgartha i Leamhcán ar an taobh thiar den phríomhchathair agus i bhFionnghlas, ó thuaidh den Life.
