Bhí cruinniú ag an bPápa Leon XIV le hUachtarán Iosrael Isaac Herzog sa Vatacáin inniu.
I ráiteas ón Vatacáin, dúradh gur phléigh an bheirt fhear "an scéal tragóideach in Gaza" agus gur iarr an Pápa sos comhraic buan a chur i bhfeidhm san iamhchríoch Phalaistíneach, soláthairtí fóirithinte a ligean isteach ann agus gialla Iosraelacha a scaoileadh saor.
Thug an an Pápa le fios freisin, a dúradh, gur thacaigh sé le réiteach an dá stát, mar a thugtar air, is é sin Iosrael agus stát Palaistíneach le taobh a chéile.
Níos túisce, ghabh Isaac Herzog buíochas leis an bPápa "as an bhfáilte chroíúil" a chuir sé roimhe sa Vatacáin.
Le hais an Phápa ar tháinig sé ina áit, níl an Pápa Leon chomh glórach maidir leis an ollmharú agus an scrios atá Iosrael a dhéanamh in Gaza.
Cháin an Pápa Proinsias na hIosraelaigh go minic agus dúirt gur cinedhíothú ab ea cuid dá raibh ar bun acu in Gaza.
Nuacht agus Cúrsaí Reatha RTÉ
