Tá Pobal Roimh Bhrabús ag iarraidh ar Shinn Féin tacú leis an Teachta Dála Neamhspleách Catherine Connolly sa toghchán Uachtaránachta seachas a n-iarrthóir féin a chur chun cinn.
Mhaígh an Teachta Dála Paul Murphy ó Phobal Roimh Bhrabús gur léirigh na pobalbhreitheanna go raibh an-seans ag Catherine Connolly an toghchán a bhuachan ar son na heite clé.
Thug sé le fios mar sin féin gur iarrthóir maith freisin a bheadh i gceannaire Shinn Féin Mary Lou McDonald.
Tá Sinn Féin le cinneadh a dhéanamh ar an gceist an mhí seo chugainn.
Mar le Catherine Connolly, dúirt Paul Murphy go mbeadh sé níos deacra ag an Rialtas fáil réidh le ceann de na prótacail a bhaineann le hÓglaigh na hÉireann a chur ar dualgas thar lear – 'an Glas Triarach', mar a thugtar air.
De réir na bprótacal sin, caithfidh Rialtas na hÉireann, Dáil Éireann agus na Náisiúin Aontaithe, caithfidh siad ar fad a mbeannacht a thabhairt sular féidir saighdiúirí as an tír seo a chur ar fiannas ar an gcoigcríoch.
Teastaíonn ón Rialtas an riachtanas triarach seo a mhaolú le nach gcaithfí dul i gcomhairle feasta leis na Náisiúin Aontaithe.
Creideann an eite chlé, áfach, gurb é neodracht na hÉireann a mhaolfaí dá ndéanfaí an t-athrú sin.
Mar le Heather Humphreys ó Fhine Gael, thug Paul Murphy le fios gur iarrthóir maith ise freisin don Uachtaránacht ach dúirt go mbeadh sé ag dul rite léi í féin a dhealú ó "na cinntí cruálacha" atá déanta ag an bpáirtí sin sa Rialtas.
Nuacht agus Cúrsaí Reatha RTÉ
