"Folús agus cailliúint nach bhfuil cur síos air" a thug sagart paróiste Charn Domhnach inniu ar bhás Natalie agus Ella McLaughlin, an mháthair agus iníon a maraíodh i dtaisme bóthair i gCo Dhún na nGall an tseachtain seo caite.
Bhuail an gluaisteán ina raibh an bheirt agus veain faoina chéile ar bhóthar an R240 i nGleann Tóchair i gCarn Domhnach ag thart ar 6.30 tráthnóna Dé Céadaoin seo caite.
Gortaíodh athair Ella agus a deirfiúr dhá bhliain d'aois sa tubaiste freisin. Tá cóir leighis á cur ar an bheirt sin in ospidéil i nDoire agus i mBéal Feirste ach deirtear nach bhfuil ceachtar acu i mbaol báis.
Sé bliana d'aois a bhí Ella, sna fichidí a bhí Natalie.
Ag Aifreann a dtórraimh i dTeach Pobail an Chroí Rónaofa, dúirt an tAthair Con McLaughlin gur cuireadh deireadh róluath le saol na beirte.
Dúirt sé go mothaíonn daoine an phian ní amháin i gCarn Domhnach ach in áiteanna eile fosta, agus bheir sé ar ais cuimhní ó thaismí eile i mBun Cranncha nuair bhí sé féin ag obair ansin.
Tugadh buíochas i nguí an phobail do na seirbhísí éigeandála a tháinig i gcabhair ar an cheathrar i ndiaidh na tubaiste agus don fhoireann leighis sna hospidéil in Allt Mhic Dhuibhleacháin i nDoire, sa Royal Victoria i mBéal Feirste agus in Otharlann Leitir Ceanainn.
Guíodh chomh maith ar son sláinte iníon eile Natalie, Rhea-Rose, agus páirtí Natalie, Tyrone Irwin.
Tugadh éide altra Natalie aníos chuig an altóir, chomh maith le béirín teidí a bhí ag Ella.
Dúirt teaghlach Natalie gur banaltra den scoth a bhí inti a raibh aird mhillteanach aici ar chúram agus ar aire a thabhairt dá hothair.
I ndiaidh an Aifrinn, adhlacadh an mháthair agus iníon san uaigh chéanna sa reilig le taobh an tséipéil.
Nuacht agus Cursaí Reatha RTÉ
