Tá seilbh gafa ag fórsaí míleata Iosrael ar luamh carthanachta amach ó chósta Gaza a bhfuil gníomhaithe ar son na Palaistíne ar bord uirthi.
Tá lastas beag soláthairtí daonchabhrach ar an mbád chomh maith – rís agus púdar bainne den chuid is mó – siombail, a deir na gníomhaithe, ar an gcuidiú atá de dhíth go géar ar mhuintir Gaza.
Dháréag atá ar an mbád, an feachtasóir aitheanta aeráide ón tSualainn Greta Thunberg ina measc.
Aird a tharraingt ar an ngéarchéim dhaonnúil in Gaza ab ea príomhaidhm na bhfeachtasóirí agus fios maith acu nach ligfeadh na hIosraelaigh dóibh ceann scríbe a bhaint amach.
Deir na hIosraelaigh nach bhfuil ar bun ag na feachtasóirí ach gníomh bolscaireachta ar son Hamas.
Dheimhnigh na hIosraelaigh ar maidin go bhfuil an luamh á tabhairt go calafort in Iosrael agus dúradh go seolfar ais chun a dtíortha féin na daoine atá ar bord uirthi.
Mar leis na soláthairtí daonchabhrach, deir na hIosraelaigh go ndáilfear iad ar dhaoine in Gaza in am trátha.
Níl Ciste Leanaí na Náisiún Aontaithe dóchasach, áfach, go dtiocfar i gcabhair ar mhuintir Gaza sula mbeidh sé ina ghorta críochnaithe ann.
Ag labhairt dó ar RTÉ ar na gortuithe a bhain do leanaí go háirithe de bharr bhuamáil shíoraí na nIosraelach – gan trácht ar an ocras agus an míchothú – dúirt urlabhraí na heagraíochta sin James Elder go bhfuil scáil an bháis chomh dubh agus chomh fairsing in Gaza anois go bhfuil sé rómhall é a ghealadh.
Nuacht agus Cúrsaí Reatha RTÉ
