Tá ar a laghad 82 duine maraithe in ionsaithe aeir agus buamáil airtléire Iosrael ar Gaza ó thús an lae, de réir lucht tarrthála.
Dúirt an Chosaint Shibhialta go ndearna Iosrael buamáil aeir ar Gaza agus gur dhírigh siad ar roinnt tithe i dtuaisceart na hiamhchríche.
Ceapadh níos luathe, gur 50 a fuair bás san ionsaí céanna, ach tá sé sin ardaithe anois go 82.
Tagann sé seo sna sála ar 80 duine bheith maraithe in ionsaithe i nGaza inné, dar leis na húdaráis sláinte.
Níos luathe an mhí seo, cheadaigh rialtas Iosrael pleananna chun an t-ionsaí a leathnú, agus labhair siad faoi Gaza a chur faoi chois.
As na 251 giall a tógadh le linn ionsaí Hamas mí Dheireadh Fómhair 2023, tá 57 fós i nGaza, 34 acu atá maraithe, dar leis an IDF.
Maraíodh 1,218 Iosraelach san ionsaí sin, formhór acu ina sibhialtaigh, de réir fhigiúirí oifigiúla Iosrael.
Deir Aireacht Sláinte Hamas i nGaza go bhfuil 52,928 duine ar a laghad maraithe ansiúd mar thoradh ar chogadh Iosrael ar Hamas, mar a thugann siadsan air, formhór acu ina sibhialtaigh. Figiúirí iad seo a mheasann na Náisiúin Aontaithe bheith iontaofa.
