Bhailigh na cairdinéil ar fad le chéile ar maidin don chéad aifreann de chuid an Phápa nua, Pápa Leo XIV. Fógraíodh inné gurb é Robert Francis Prevost a thiocfaidh i gcomharbas ar Phápa Prionsias.
Dúirt sé ina chéad aitheasc mar Phápa - le linn aifreann príobháideach na gcairdinéal sa Séipéal Sistíneach ar maidin - go bhfuil sé ag súil "go ndéanfaidh an Eaglais Chaitliceach oícheanta dorcha an tsaoil seo níos gile" le linn a phápachta.
Thug sé le fios freisin gur "riarthóir dílis" ar an Eaglais Chaitliceach ina hiomláine a bheidh ann, agus go bhfuil naofacht bhaill na heaglaise – seachas galántacht mhaoin na hEaglaise – ina cloch is mó ar a pháidrín.
pápa nua tofa
Beidh Pápa Leo XIV ar an gcéad phápa riamh as Stáit Aontaithe Mheirceá.
Is Agaistíneach é a rugadh in Chicago. Tá sé 69 mbliana d'aois agus ceapadh é ina chairdinéil i 2023.
Toghadh é le linn thionól rúnda na gcairdinéal sa Séipéal Sistíneach.
Steall na gártha molta as an slua a bhí bailithe i gCearnóg Pheadair sa Vatacáin inné nuair a fógraíodh go raibh pápa nua tofa. Ach níor thuig siad ag an am cé a bhí ann.
Chaith Pápa Leo XIV scór bliain ag obair i bPéiriú mar mhisinéir.
Labhróidh sé leis na meáin den chéad uair maidin Dé Luain.
