Tá sé ráite ag Príomhaire Cheanada, Mark Carney, le hUachtarán Trump Mheirceá nach bhfuil Ceanada ar díol, agus nach bhfuil aon spéis ag muintir na tíre sin a bheith mar chuid de na Stáit Aontaithe.
Bhí tús cairdiúil leis an gcruinniú, in ainneoin ráiteas Donald Trump roimhe seo, inar thug sé le fios gur mhaith leis Ceanada a ghabháil.
Tháinig an t-ábhar sin chun cinn nuair a chur iriseoir ceist ar an mbeirt fhear faoi. "Ní bheidh an t-ábhar áirithe sin á phlé againn inniu. Ach sílim féin gur pósadh iontach a bheadh ann", a d'fhreagair an tUachtarán Trump.
"Níl Ceanada ar díol agus ní bheidh chóiche", a dúirt an tUasal Carney.
"Ní bheadh a fhios agat go deo", a dúirt an tUachtarán Trump.
Thug an tUachtarán Trump le fios go mbeadh "ceisteanna deacra" á bplé le linn an chruinnithe idir an bheirt cheannaire inniu. Táthar den tuairim gur ag tagairt a bhí sé ag an am do ráiteas a rinne sé roimhe seo inar dhúirt sé nach bhfuil aon ghá le táirgí de chuid Cheanada sna Stáit Aontaithe.
"Beidh Ceanada agus na Stáit Aontaithe mór lena chéile i gcónaí", a dúirt an tUachtarán Trump, "beag beann ar a bhfuil ráite go dtí seo."
Bhuaigh páirtí liobrálach Mark Carney an t-olltoghchán i gCeanada ag deireadh mhí Aibreáin. Gheall sé roimh an toghchán go n-éireodh leis socrú nua eacnamíochta agus slándála a aontú leis na Stáit Aontaithe.
