Theip ar an iománaí aitheanta as Luimneach Kyle Hayes san achomharc a rinne sé in aghaidh a chiontaithe faoi thiomáint chontúirteach.
I gCúirt Dúiche Mhala i gCo Chorcaí i mí Mheán Fómhair anuraidh, cuireadh cosc tiomána ar feadh dhá bhliain ar Kyle Hayes, atá 26 bliain d'aois, nuair a d'admhaigh sé go raibh luas 155 ciliméadar san uair faoi i gceantar 100 ciliméadar san uair.
Sa chúirt achomharc i gCorcaigh inniu, dúirt an Breitheamh Helen Boyle nár ghlac sí leis gur tiomáint neamhaireach a bhí ann seachas tiomáint chontúirteach, mar a mhaígh Kyle Hayes.
Chomh maith leis an gcosc tiomána, a dtiocfaidh feidhm leis ar an 12 Meitheamh, gearradh fíneáil €250 ar Kyle Hayes.
Is as Baile Uí Aisí, Cill Diomá, i gCo Luimnigh do Kyle Hayes, duine de na hiománaithe is cumasaí in Éirinn a bhfuil cúig bhonn craoibhe Uile-Éireann buaite aige.
I mí na Nollag 2023, gearradh dhá bhliain príosúin ar fionraí air nuair a ciontaíodh é in achrann foréigneach agus d'fhéadfadh an rialú a rinneadh sa chúirt achomharc inniu dul i gcion ar an gcás úd.
Tá breithiúnas le déanamh an tseachtain seo chugainn ar an téarma fionraíochta a gearradh air an uair úd i bhfianaise a chiontaithe faoi thiomáint chontúirteach ina dhiaidh sin.
Nuacht agus Cúrsaí Reatha RTÉ
