Dúirt an Taoiseach Micheál Martin nár mhór don Aontas Eorpach agus do na Stáit Aontaithe comhoibriú le chéile i dtaca le cúrsaí trádála mar go mbeadh daoine sa dá áit thíos leis, arsa sé, dá gcuirfí polasaithe cosantaíocha i bhfeidhm.
Ag trácht a bhí an Taoiseach ar na taraifí a cheaptar atá Uachtarán na Stát Aontaithe Donald Trump le gearradh ar an Aontas Eorpach go gairid.
Ag labhairt sa Bhruiséil a bhí sé, mar a bhfuil ceannairí an Aontais Eorpaigh tagtha i ndáil chomhairle le cúrsaí cosanta míleata a chriathrú agus neamhchinnteacht ann faoina bhfuil ar intinn ag Donald Trump maidir leis an gcogadh san Úcráin.
Is minic Donald Trump ag caint ar acmhainn Eagraíocht Chonradh an Atlantaigh Thuaidh a mhaolú ar chúiseanna éagsúla, agus tá imní ar cheannairí an Aontais Eorpaigh go bhféadfadh sin dul i gcion ar chumas na hÚcráine cur in aghaidh na Rúise.
Cruinniú neamhfhoirmiúil atá sa teacht le chéile sa Bhruiséil agus tá éan cuideáin – Príomh-Aire na Breataine Keir Starmer – tá sé le páirt a ghlacadh ann níos deireanaí tráthnóna.
Seo é an chéad uair ag aon Phríomh-Aire na Breataine dul i ndáil cheannairí an Aontais Eorpaigh ó d'imigh an Bhreatain as an Aontas cúig bliana go ham seo.
Nuacht agus Cúrsaí Reatha RTÉ
