I gCúirt Chuarda Luimnigh, gearradh sé bliana go leith príosúin ar fhear 21 bliain d'aois as tiomáint chontúirteach arbh é bás fir óig eile a thoradh.
Maraíodh Joe Drennan, mac léinn 21 bliain as Maighean Rátha i gCo Laoise, nuair a bhuail gluaisteán é agus é ag fanacht le bus ar Bhóthar Bhaile Átha Cliath i Luimneach ar an 13 Deireadh Fomhair 2023.
Ba é Kieran Fogarty as Bóthar de hÍde i Luimneach an té a bhí ag tiomáint an ghluaisteáin ach níor stop sé ar an láthair le teacht i gcabhair ar Joe Drennan.
Céim san iriseoireacht in Ollscoil Luimnigh a bhí idir lámha ag Joe Drennan nuair a maraíodh é. Bhí sé sa cheathrú bliain ag an am.
Bhí a mhuintir sa chúirt inniu nuair a gearradh an phianbhreith ar Kieran Fogarty ach ní mó ná sásta a bhí siad.
Tim Drennan, athair Joe, dúirt sé leis an mbreitheamh nach raibh na sé bliana go leith príosúin a gearradh ar an gciontóir sách fada.
Máthair Joe, Marguerite Drennan, agus deirfiúracha an fhir óig, Sarah, Ava agus Marie, dúirt siad taobh amuigh den chúirt gur chuir boige na pianbhreithe samhnas orthu.
I gceann na sé bliana go leith atá le cur isteach ag Kieran Fogarty, gearradh ocht mbliana príosúin air sa chúirt chéanna inniu as ionsaí lámhaigh a dhéanamh i Luimneach i mí an Mheithimh 2023.
Nuacht agus Cúrsaí Reatha RTÉ
