Tá an Teachta Dála ó Shinn Féin Pa Daly ag féachaint le cás dlí a thabhairt maidir leis an gcead atá tugtha ag an Rialtas nuabhunaithe do cheathrar Airí Stáit freastal ar chruinnithe den Chomhaireacht.
Is iad na hAirí Stáit atá i gceist Hildegarde Naughton ó Fhine Gael, Mary Butler ó Fhianna Fáil, agus na Neamhspleáigh Seán Canney agus Noel Grealish ón nGrúpa Réigiúnach.
Tá cead á lorg ag Pa Daly ar an Ard-Chúirt an cás dlí a thabhairt le súil go bhfógrófar go bhfuil sé míbhunreachtúil an ceathrar a bheith i láthair ag cruinnithe den Chomhaireacht.
De réir Bhunreacht na hÉireann, a deir sé, níl cead ag níos mó ná cúig dhuine dhéag freastal ar chruinnithe den Chomhaireacht.
Dar le Pa Daly go gcaithfidh an Rialtas reifreann a ghairm más mian leo tuilleadh daoine a scaoileadh isteach sna cruinnithe sin.
Éistfear iarrtas Pa Daly ar an gcás a thionscnamh tráthnóna amárach.
Nuacht agus Cúrsaí Reatha RTÉ
