Tá sé dearbhaithe ag an tSeirbhís Páirceanna Náisiúnta agus Fiadhúlra gur lámhachadh agus gur maraíodh Iolar Mara, éan creiche neamhchoitianta, i gCo na hIarmhí le gairid.
Iolar Mara baineann a bhí inti agus bhí sí thart ar dhá bhliain d'aois.
Scaoileadh saor í in aice le hInbhear na Sionainne in 2022 mar chuid de Thionscadal Athbhunaithe an Iolair Mhara.
Léiríonn faisnéis ón gclib satailíte a bhí feistithe uirthi gur bhásaigh sí uair éigin ar an 6 Nollaig idir Baile na Feide agus Port na Seangán ar an taobh thoir de Loch Uail san Iarmhí.
Léiríonn an fhaisnéis freisin go raibh an tIolar Mara sa cheantar sin ar feadh cúpla seachtain sular maraíodh í.
In 2023, bhí sí i gCiarraí Thuaidh, i nDún na nGall, i dtuaisceart Aontroma, i bhFear Manach, sa Chabhán agus in áiteanna nach iad.
Éan faoi chosaint is ea an tIolar Mara Haliaeetus albicilla agus is féidir an dlí a chur ar aon duine a mharaíonn é.
Nuacht agus Cúrsaí Reatha RTÉ
