Tuairiscítear deichniúr ar a laghad a bheith maraithe anois ag na tinte foraoise atá ag scaipeadh as éadan i stát California ar chósta thiar na Stát Aontaithe.
Glactar leis go méadóidh an figiúir sin de réir a chéile.
Tá cathair Los Angeles go mór faoi léigear ag na tinte a chuaigh in olcas i gcaitheamh na hoíche de bharr neartú na gaoithe.
Tá fainic curtha ag na húdaráis ar an bpobal go bhféadfadh cúrsaí dul in olcas.
Deirtear go bhfuil dhá thine éagsúla ansin (Palisades agus Eaton) a bhfuil contúirt an-mhór ag baint leo.
Tá seirbhísí dóiteáin ag rá nach aon chúnamh dóibh an aimsir ghaofar faoi láthair.
Áirítear suas le 10,000 teach cónaithe agus foirgnimh eile a bheith scriosta go hiomlán nó dóite go talamh.
D'fhéadfadh sé go gcosnódh na tinte sléibhe seo suas le 150 billiún dollar ar phobal Los Angeles.
Tá luach 6 mhí de chúiteamh á thairiscint ag an Uachtarán Biden agus é i gceist ag Rialtas Mheiriceá an costas ar fad a bhaineann leis an athchóiriú a íoc ar ais le stát California.
Tá ordú tugtha ag údaráis sa chathair do suas le 180,000 duine a dtithe cónaithe a thréigean.
Tá roinnt de na daoine sin ag déanamh a mbealaigh ar ais le cúpla lá;tá na húdaráis ag rá leo áfach a bheith cúramach mar go bhfuil cuid mhór damáiste déanta agus go bhféadfadh struchtúir áirithe a bheith míshocair.
Tá beatha agus seirbhísí eile á gcur ar fáil do dhaoine a raibh orthu sin a dtithe a fhágáil.
Fadhb mhór eile ansin anois a deirtear is ea an chreachadóireacht agus tá cuirfiú i bhfeidhm féachaint le dul i ngleic leis.
