Beidh Calafort Caergybi sa Bhreatain Bheag dúnta go ceann míosa eile agus ní osclóidh sé arís go dtí 15 Eanáir ar a luaithe.
Tá seirbhísí farantóireachta idir Baile Átha Cliath agus Caergybi curtha ar ceal nó go bhfógrófar a mhalairt.
Tá an calafort dúnta ón 7 Nollaig mar gheall ar an damáiste suntasach a rinneadh do cheann de na beartanna feisithe ansin le linn na stoirme an oíche roimhe sin.
I ráiteas, dúirt bainistíocht Chalafort Caergybi gur thuig siad go raibh an scéal tar éis dul i gcion go mór ar chúrsaí trádála, ar phaisinéirí agus ar chustaiméirí.
Tugadh le fios sa ráiteas go ndearnadh an cinneadh an calafort a choimeád dúnta go ceann míosa eile le go mbeadh uain ag daoine socruithe eile a dhéanamh a bhféadfaidís brath orthu.
Dúirt an comhlacht farantóireachta Stena Line go raibh siad ag cur scéala chuig paisnéirí atá thíos leis.
Daoine a bhí le dul ar an mbád idir Baile Átha Cliath agus Caergybi ón 20 Nollaig, is féidir leo a dticéid a aistriú go seirbhísí eile – Baile Átha Cliath-Learpholl, Baile Átha Cliath-Abergwaun agus Béal Feirste-Càrn Rìoghain ina measc.
Nuacht agus Cúrsaí Reatha RTÉ
