I gCúirt Choiriúil Chuarda Bhaile Átha Cliath, gearradh trí bliana príosúin ar an iarimreoir rugbaí Brendan Mullin faoi os cionn €570,000 a ghoid ó Bhanc Príobháideach Bhanc na hÉireann agus faoi shonraisc bhréagacha a sholáthar don bhanc.
Phléadáil Brendan Mullin, atá 61 bliain d'aois, neamhchiontach sna cúiseanna.
Dúradh ina thriail go ndearna sé na cionta i gceannáras Bhanc Príobháideach Bhanc na hÉireann i mBaile Átha Cliath idir Iúil 2011 agus Márta 2013, tráth a bhí sé ina phríomhfheidhmeanach ar an mbanc.
Dúirt an Breitheamh Martin Nolan sa chúirt inniu cé nach ndúirt Brendan Mullin riamh cén fáth a ndearna sé na cionta gur dóigh gur gannchúis airgid a bhí air a lig i gcathú é.
Chuir an breitheamh san áireamh mar imthoisc mhaolaitheach, a dúirt sé, gur íoc Brendan Mulliin an t-airgead ar fad ar ais leis an mbanc.
Imthoisc mhaolaitheach eile, arsa an breitheamh, is ea an tamall fada a bhain sé as an Stát an cás a phróiseáil.
Trícheathrúnach amuigh ab ea Brendan Mullin a d'imir d'fhoireann rugbaí na hÉireann 55 uair idir 1984 agus 1995.
D'aimsigh sé seacht n-úd déag le linn dó a bheith ag imirt d'Éirinn.
Nuacht agus Cúrsaí Reatha RTÉ
