Tá an craoltóir, an scríbhneoir agus an ceoltóir Kathleen Watkins tar éis bháis. Bhí sí 90 bliain d'aois.
Bhí Kathleen Watkins pósta leis an gcraoltóir aitheanta le RTÉ Gay Byrne a fuair bás cúig bliana ó shin.
Ba as Teach Sagard in iardheisceart Chontae Átha Cliath Kathleen Watkins ó dhúchas.
Bhain sí cáil amach ina hóige mar chláirseoir agus mar amhránaí tíre sula bhfuair sí post in RTÉ mar láithreoir leanúnachais.
Go deimhin, ba í féin an chéad láithreoir leanúnachais a chonacthas ar an scáileán nuair a seoladh Telefís Éireann Oíche Chinn Bhliana 1961.
Bhí aithne aici ar Gay Byrne roimhe sin agus phós siad i 1964.
Bhi baint ag Kathleen Watkins le cláir éagsúla ar RTÉ i gcaitheamh na mblianta agus bhí an-tóir go háirithe ar an tsraith Faces & Places a chuir sí i láthair sna 1980í.
Blianta i ndiaidh di éirí as an gcraoltóireacht, scríobh Kathleen Watkins sraith scéalta do pháistí faoi mhuicín gleoite darb ainm Pigín agus ar bronnadh gradam scríbhneoireachta uirthi as.
Maireann a beirt iníonacha agus a cúigear garpháistí.
Nuacht agus Cúrsaí Reatha RTÉ
