Tá cáineadh déanta ar Aire Pobal Stormont, Gordon Lyons ón DUP, faoi chruinniú a bheith aige le grúpa atá bainteach le paraimíleataigh dhílseacha tar éis gur dhiúltaigh sé cruinniú a bheith aige le Conradh na Gaeilge.
Bhí comhráite ag Gordon Lyons leis an ngrúpa dílseach, an LCC, Dé Máirt seo caite.
Scáthghrúpa is ea an LCC a labhraíonn thar ceann an UVF agus an UDA.
Tá an LCC ag cur go láidir in aghaidh bunscoil Ghaeilge a bhunú in oirthear Bhéal Feirste agus tuigtear gur chuir siad a ndearcadh ar an gceist in iúl do Gordon Lyons sa chruinniú.
Phléigh na dílseoirí ceist na scoile le haire eile ón DUP – an tAire Oideachais Paul Givan – i gcruinniú a bhí acu leisean le gairid.
Tá imeaglú á dhéanamh ag dílseoirí ar lucht na bunscoile Gaeilge ó fógraíodh go rabhthas lena bunú.
Le hais na fáilte a cuireadh roimh an LCC, deir Conradh na Gaeilge gur dhiúltaigh an DUP gach uile iarratas a rinne an eagraíocht ar chruinniú ó hathbhunaíodh Feidhmeannas Stormont i dtús na bliana.
Deir an Conradh cé gurb é Gordon Lyons is mó atá freagrach as straitéis Ghaeilge Stormont gur dhiúltaigh sé a n-iarratas ar chruinniú lena phlé.
Dúirt urlabhraí Gordon Lyons go raibh cruinnithe aige roimhe seo le hionadaithe ó dhá eagraíocht Ghaeilge eile, mar atá, Forbairt Feirste agus Foras na Gaeilge.
Nuacht agus Cúrsaí Reatha RTÉ
