Tá Florida fós á thuargaint ag Spéirling Milton a bhfuil damáiste mór déanta aici ar fud an stáit sin cheana féin.
Tuairiscítear gur chruthaigh an spéirling naoi dtornádó dhéag agus gur scriosadh 125 áras cónaithe a bhí ina bealach, teachíní soghluaiste den chuid is mó.
Deirtear freisin gur maraíodh beirt ar a laghad nuair a bhuail ceann de na camanfaí lonnaíocht do sheanóirí ar chósta thoir Florida.
Is cinnte go marófaí tuilleadh daoine murach gur ordaíodh do na milliúin aslonnú agus murach haistí a bheith sparrtha le hucht na stoirme.
Tá 3.2 milliún duine fágtha gan aon chumacht aibhléise mar gheall ar an scrios.
Is ar an gcósta thiar a tháinig an spéirling i dtír i dtosach agus luas 195 ciliméadar san uair fúithi.
Tá sí lagaithe ó shin agus is 150 ciliméadar san uair atá fúithi i láthair na huaire.
Maraíodh 235 duine ar a laghad nuair a bhuail Spéirling Helene réigiún Florida coicís ó shin.
Nuacht agus Cúrsaí Reatha RTÉ
