Tuairiscítear gur maraíodh naonúr agus gur gortaíodh barr ar 300 duine nuair a phléasc gairis raidió láimhe le comhaltaí den eagraíocht mhíleata Hezbollah sa Liobáin tráthnóna inniu.
Deirtear gur in oirthear agus i ndeisceart na Liobáine agus sa phríomhchathair Béiriút a phléasc na siúlscéalaithe, mar a thugtar orthu.
De réir ghníomhaireacht nuachta na Liobáine, is i nGleann Bheiceá in oirthear na tíre a maraíodh triúr den naonúr.
Phléasc gaireas amháin ar a laghad ag sochraid chomhalta de Hezbollah a bhí ar dhuine de dháréag a maraíodh nuair a phléasc na mílte glaoire póca in áiteanna éagsúla sa Liobáin inné.
Tuigtear gur cheannaigh Hezbollah na siúlscéalaithe cúig mhí ó shin, an t-am céanna a cheannaigh siad na glaoirí póca.
Nuacht agus Cúrsaí Reatha RTÉ
