Tá Scoil na mBráithre Críostaí ar Shráid Synge i mBaile Átha Cliath le hiompú ina scoil lán-Ghaeilge.
Meánscoil Bhéarla sheanbhunaithe i lár dheisceart na cathrach atá sa scoil a ndeachaigh go leor daoine aitheanta ann.
Fir iad na daoine aitheanta úd ar fad mar nach raibh aon ghlacadh le cailíní sa scoil – go nuige seo!
Claochlú iomlán atá i ndán don scoil i gceann dhá bhliain, más ea – idir theanga agus ghnéas.
Chomh maith le bheith ina Gaelcholáiste ón scoilbhliain 2026-27, scoil chomhoideachais a bheas inti freisin.
I ráiteas, dúirt an tAire Oideachais Norma Foley go mb'áthas léi cinneadh na bpátrún, Iontaobhas Scoileanna Éamainn Rís, an scoil an iompú ina scoil lán-Ghaeilge.
"Is eol dom go bhfuil éileamh le fada ar Ghaelcholáiste i mBaile Átha Cliath 2, 4, 6 agus 8", arsa sí, "agus tá lúcháir orm go bhfuil ceann againn anois i gcroílár Bhaile Átha Cliath 2".
In 2017, thug Bunscoil Shráid Synge sruth lán-Ghaeilge isteach agus cuirtear oideachas trí Ghaeilge ar fáil do gach bliain ann.
Ó tugadh isteach an sruth, tá méadú thart ar 42% tagtha ar an líon daltaí atá cláraithe sa bhunscoil.
Nuacht agus Cúrsaí Reatha RTÉ
