Tugadh ógánach seacht mbliana déag os comhair cúirte i Learpholl inniu agus é cúisithe i dtriúr cailíní óga a dhúnmharú i mbaile Southport Dé Luain seo caite.
Sin é Axel Muganwa Rudakubana as sráidbhaile Banks in aice le Southport.
Tar éis go ndúradh roimhe seo nach raibh cead a ainm a fhoilsiú de bharr nach bhfuil sé in aois fir, rialaigh an chúirt inniu an toirmeasc sin a chur ar neamhní.
Chomh maith le dúnmharú an triúir, tá Axel Rudakubana cúisithe in iarracht a dhéanamh deichniúr eile a dhúnmharú agus in acra faobhrach a bheith ina sheilbh aige.
Ní dhearna sé aon phléadáil sa chúirt inniu.
D'ordaigh an breitheamh é a thabhairt os comhair cúirte arís ar an 25 Deireadh Fómhair agus cuireadh siar faoi choinneáil é idir an dá linn.
Is iad an triúr a maraíodh Bebe King, sé bliana, Elsie Dot Stancombe, seacht mbliana, agus Alice Dasilva Aguiar, a bhí naoi mbliana.
As an deichniúr a gortaíodh, tá cúigear páistí agus beirt daoine fásta an-dona tinn.
Bhí na páistí ag glacadh páirt i rang damhsa i lár Southport nuair a hionsaíodh iad go gairid roimh an meán lae ar an Luan.
Nuacht agus Cúrsaí Reatha RTÉ
