Rialaigh an Chúirt Uachtarach trathnóna inniu go ndearna an Chúirt Oibreachais botún de réir dlí nuair a d'ordaigh an chúirt sin a phost a thabhairt ar ais do phríomhoide Gaelscoile a briseadh as a phost beagnach deich mbliana ó shin.
Dar leis an gCúirt Uachtarach go raibh an ceart ag an gCúirt Oibreachais a rialú gur go héagórach a briseadh Aodhagán Ó Suird as a phost mar phríomhoide ar Ghaelscoil Moshíológ i Loch Garman ach gur botún a bhí ann ordú a phost a thabhairt ar ais dó.
Ina ainneoin sin, dúirt an Príomhbhreitheamh Donal O'Donnell go raibh sé blianta fada ó cuireadh tús leis an gcás agus nach mbeadh sé feiliúnach rialú na Cúirte Oibreachais a chur i leataobh nó a athmheas anois.
Dúirt an Príomhbhreitheamh freisin go raibh Aodhagán Ó Suird ar ais ina phost mar phríomhoide le bliain agus go raibh an té a bhí ag feidhmiú mar phríomhoide sna blianta roimhe sin imithe as an scoil anois.
Rialaigh an Chúirt Uachtarach freisin gur cheart do bhord bainistíochta na scoile riaráistí pá a íoc le hAodhagán Ó Suird.
Briseadh Aodhagán Ó Suird as a phost de bharr gur cuireadh mírialtachtaí maidir le figiúirí rolla ina leith.
Nuacht agus Cúrsaí Reatha RTÉ
