Tá Donald Trump tar éis a theacht go caithréimeach os comhair Chomhdháil Náisiúnta an Pháirtí Phoblachtánaigh sna Stáit Aontaithe, áit ar chuir na múrtha san halla fáilte lúcháireach roimhe, 2 lá tar éis an iarracht a déanadh é a chaitheamh ag slógadh feachtasaíochta i bPennsylvania.
Bhí bindealán beag ar a chluas dheas áit ar ghortaigh smionagar piléir é, agus sheas an slua agus thug na gártha molta dó san Fiserv Forum i Milwaukee.
Bhí siad ag fógairt "Fight! Fight! Fight" agus a gcuid dorn san aer, ag déanamh aithris ar Trump féin díreach tar éis an ionsaithe tráthnóna Dé Sathairn.
Bhí an t-iar Uachtarán i láthair le cuid dá mhuintir, gan a bhean chéile a bheith leis, i gcuideachta an tSeanadóra JD Vance atá roghnaithe ag Trump le seasamh leis mar iarrthóir don leas-uachtaránacht sa toghchán mí na Samhna.
Tharraing Vance cáil ar dtús lena leabhar "Hillbilly Elegy".
Bhí gliondar le brath freisin ag an ócáid - comhdháil a mhairfidh 4 lá agus a dheimhneoidh gurbh é Trump rogha na Republicans - agus breithiúnas tugtha tamall gearr roimh réidh ó chúirt i Florida ag caitheamh amach an chás a bhí curtha ag an Rialtas Feidearálach ina aghaidh go raibh cáipéisí rúnda Stáit ina sheilbh go mhídhleathúil san óstán atá aige, Mar-a-Lago i Florida, tar éis dó imeacht as oifig.
Le linn an fheachtais toghchánaíochta i 2016 cháin JD Vance (39) an tUasal Trump go fíochmhar, ach ó shin tá sé i measc a lucht leanúna is dílse agus aontaíonn sé go láidir le seasamh Trump go raibh an toghchán i 2020 a bhuaigh Joe Biden cám.
Labhair Sean O'Brien, uachtarán an International Brotherhood of Teamsters - cumann na dtiománaithe lastais, ceann de na ceardchumainn is tábhachtaí i Meiriceá - ag an gcomhdháil agus cé nár thug sé tacaíocht oifigiúil an Chumainn do Trump, mhol sé go tréan é agus cháin sé 'polaitíocht Washington' a dúirt sé atá ag déanamh dochair do lucht oibre na tíre.
As seo go ceann cúpla seachtain a dhéanfaidh na Teamsters cinneadh faoi thacaíocht oifigiúil a thabhairt do Trump nó Biden, agus buille suntasach a bheadh ann d'fheachtas na Democrats muna seasann siad le Biden, mar a rinne 4 bliana ó shin.
De réir na bpobalbhreitheanna is beag idir Trump (78) agus Biden (81) ach tá fear Nua Eabhrac chun cinn i riar maith de na stáit is mó ina bhfuil sé ina choimhlint ghéar idir an dá thaobh.
Ní raibh Trump sásta a rá fós go nglacfaidh sé leis na torthaí má buailtear arís sa toghchán é.
Aréir freisin thug Taylor Budowich le fios go bhfuil MAGA Inc - an príomh "super PAC" atá ag cruinniú airgid d’fheachtas Trump - tar éis breis is $50 milliún (€45 milliún) a bhailiú.
Seift atá sna "political action committees" ag an dá pháirtí i Meiriceá le airgeadh a charnadh le tabhairt faoi stocaireacht agus faoi fheachtasaíocht.
Tá sé tugtha le fios ag an mbilliúnaí Elon Musk a deir an Wall Street Journal go bhfuil rún aige $45 milliún sa mí a shíneadh ag "super PAC" nua le cuidiú le Trump, cinneadh atá déanta aige deirtear ó tháinig an t-iarrthóir slán ón iarracht ar fheallmharú.
