Tá an rialtas le €8.3 billiún sa bhreis a chur fáil le Buiséad 2025 a mhaoiniú. Beidh Buiséad 2025 ar an gcáináisnéis dheireanach faoi chúram an rialtais reatha, sula mbeidh olltoghchán ann.
Caithfear €1.4bn den €8.3bn sin ar chiorruithe cánach agus caithfear €6.9bn ar chaiteachas sa bhreis.
Fágann sé sin go dtiocfaidh ardú 6.9% ar chaiteachas an rialtais i 2025, rud a sháraíonn rialacha an rialtais féin, faoinar chóir caiteachas a choimeád faoi bhun 5% i gcaitheamh bliana.
Cheadaigh an rialtas €1.5bn euro sa bhreis don tseirbhís sláinte i mbliana freisin.
Deir an rialtas gur ghlac siad an cinneadh seo chun caiteachas caipitiúil a mhéadú agus chun seirbhísí níos fearr a chur ar fáil; seirbhísí atá de dhíth, a deir siad, i bhfianaise daonra na tíre a bheith níos airde ná mar a bhí súil leis.
Tá na sonraí clúdaithe i Ráiteas Eacnamaíochta an tSamhraidh, a cheadaigh an chomhaireacht ar maidin. Foilsíodh an ráiteas ag am lóin inniu.
An mhí seo caite, tháinig sé chun cinn go bhfuil an Roinn Sláinte €1.1bn thar bhuiséad cheana féin.
Bhí sraith cruinnithe idir an tAire Caiteachais Phoiblí, Pascal Donohue, agus an tAire Sláinte, Stephen Donnelly, le seachtainí anuas féachaint le plean a bheartú chun dul i ngleic leis an róchaiteachas.
