Tá sé ionann is cinnte go ndearbhóidh torthaí na dtoghchán san Afraic Theas go bhfuil deireadh le réimeas 30 bliain pháirtí an African National Congress i gcumhacht tromlaigh ar an tír.
Fearg maidir le ráta ard dífhostaíochta, ciorruithe cumhachta agus easpa comhionnanais a ba chúis leis an phobal a míshástacht leis an ANC a chur in iúl sna botháin vótála Dé Céadaoine seo caite.
40% den vóta a fuair an páirtí sa toghchán - titim mhór ón sciar de 57.5% a fuair siad i 2019.
Is iad an ANC páirtí ghluaiseacht saoirse na hAfraice Theas a tháinig chun cinn go mór san iarracht Nelson Mandela a shaoradh ó phríosún agus deireadh a chur le réimeas bán na cinedheighilte sa tír i 1994.
Rachaidh na páirtithe i mbun idirbheartaíochta anois le rialtas nua a chur le chéile, sula n-iarrfar ar an pharlaimint uachtarán nua a ainmniú.
Meastar gur as páirtí an ANC a roghnófar an t-uachtarán ainneoin go bhfuil páirtithe eile ag éileamh go n-éireodh an tUachtarán Cyril Ramaphosa as oifig sular féidir comhrialtas a bhunú.
Síltear go mbfhéidir nach fada eile a mhairfeas Ramaphosa ina Uachtarán má ghéilleann an ANC do na páirtithe eile nó má thugann iarrthóir eile taobh istigh den pháirtí a dhúshlán.
